Gecəyarı verilən pizza sifarişləri ilə qlobal hərbi böhranların nə ortaq cəhəti ola bilər? Əslində gözlədiyinizdən daha çox var.
İyunda iki gecə bu məqamı aydın şəkildə göstərdi: İsrailin İranın nüvə obyektlərinə gözlənilməz hava hücumundan dərhal əvvəl Pentaqon ətrafındakı, demək olar ki, bütün pizza məkanları sifarişlərlə aşıb-daşırdı.
Doqquz gün sonra daha bir sıçrayış baş verdi. Budəfəki sifarişlər isə ABŞ-nin İranın nüvə obyektlərinə qarşı öz bombardman kampaniyasını elan etməsindən əvvələ təsadüf edirdi. Hətta adətən Pentaqon işçilərinin günün sonunda toplaşdığı yerlər də qeyri-adi dərəcədə sakit idi, bu da işçilərin gecə saatlarınadək işlədiyini və böyük bir hadisənin baş verməkdə olduğuna işarə idi.
Bu nümunə "Pentaqon Pizza İndeksi" adlanan qəribə, amma təəccüblü dərəcədə davamlı bir nəzəriyyənin əsasını təşkil edir. Bu nəzəriyyəyə görə, Pentaqon ətrafında pizza sifarişlərində qəfil bir artım müşahidə edildikdə böyük bir hadisənin baş vermək üzrə olduğu anlaşılır.
Məntiq sadədir: böhran yaxınlaşanda Pentaqon və kəşfiyyat işçiləri gecə boyunca işləyir və gec işləyən komandalar üçün pizza əsas enerji mənbəyinə çevrilir.
Pizza çatdırılmalarındakı bu qeyri-adi artımlar indi "Google Maps"in "pik saatlar" funksiyası və bu tendensiyaları izləyən sosial media hesabları sayəsində real vaxtda izlənilə bilər.
Bu çox sadə səslənə bilər, amma onilliklər ərzində yaranan "təsadüf"lərdən sonra bu tendensiyanı görməməzlikdən gəlmək çətindir.
ABŞ-nin 1983-cü ildə Qrenadaya hərbi müdaxiləsindən əvvəl Pentaqon yaxınlığında pizza çatdırılmaları təxminən iki dəfə artmışdı. 1991-ci ildə, ABŞ "Səhrada tufan" əməliyyatına hazırlaşarkən gecə saatlarında Pentaqon və Mərkəzi Kəşfiyyat İdarəsinə (CIA) pizza sifarişləri yenidən kəskin şəkildə çoxalmışdı.
Rəsmi şəxslər bu nəzəriyyəni rədd etsələr də, jurnalistlər və açıq mənbə araşdırıcıları izləməyə davam edir, çünki bəzən qlobal böhranın ilk əlaməti pizza qutularının yığılmasıdır.
